De "Illusion"

Immer, wenn es Härwest worre, wenn sich de Bletter uffn Bähmern jälleb färweten, kam dor Weesenmarcht nach Eislemm. Jeden Sonntahch nachen fuffzähnten Säptämber worre eröffnet, awwer dor Haupttahch woar dor Montahch. Kae Mansfäller vorrsäumte, am Weesenmarchtsmontahch uff de Weese rungerzetrecken, met Kingk un Kegel, sojoahr außer Jrunddärfern kahmen se rewwer. Met de Fahrräder, uff de Baene un aach met de Fährewaachen.
Schon ne Woche vorrhäher, wenn se ungene uffbauten, schtrohmerten de Kinger, awwer aach de Ahlen, um de Buhden un de Wohnwaachen drummerum. ´s woar de Neijiehrde un aach de Vorfreide.
Zippel Petzsch liehßes sich aach nich nähm, un nach dor Schicht jingke erscht joarnich haeme, sonnern jleich uff de Weese runger, um sich ä Linzchen ummezesähn. Se bauten jrahde anne neie Buhde uff, die ä noch kae Joahr uff dor Weese jesähn hotte. "Illusionen" schtand ohm drewwer, un kaener - aach Zippel niche - wußte met dähm Worte was ahnzufangen. De Raterei uffen Schachte woar jrohß.
Das Schlimmeste awwer woar, daß Zippel an dor Buhde anne Fraue jesähen hotte, die en zublinzälte. Jedenfalls woarsch ihm so, un je effter ähr an dor Buhde vorrbeijingk, hotte immer wedder das Jefiehel, dasse sen zublinzälte. "Menschenskinner", dachte bei siche, "die wärds doch nich uff mich abjesähn hamm? Ich Ahler un so ne Jungke?"
Awwer´s liehßen kaene Ruhe, un nachts konne schohn nich mehr richtj schlahfen. Jeden Tahch, nach dor Schicht schliche erscht um de Buhde rum, ehe haeme zu Friedan jingk, un ähr märkte, dasse se immer freindlicher worre, de Fraue von dor Buhde.
Dunnerlittchen, wie da sei Härrze kloppte. Nachtern märkte, dasse schließlich in de jungke Fraue ä bißchen vorrliehwet woar. Ähr liehß sich awwer nischt ahnmerken, nuhr Friedan kahmbs doch nich jeheier vor, se märkte, daß mettn Aheln was nich schtimmte.
Wie se nu endlich su weit woar, de Äreffnungk von Weesenmarcht, als nähmlich de Buhden uffmachten, woar Zippel dor Erschte, dähr in de "Illusionen" neinschtärmte.
Friedan hotte joarnisch metjenomm. Die sahß haeme un kwähkte, denn das woar in ehern janzen Lähm das erschte Moal, daß Zippel janz allaene uff de Weese jingk un Friedan haeme hocken liehß.
Dähr sahß nu met veeheln annern uff de Brätterbänke in dor Buhde un woahrtete bis dor Vorhangk uffjingk. Awwer draußen schrieh noch dor Ausruhfer nach immer mehr Leite, obwohl de Buhde schohn jerammelte voll woar. Doch nu jingk endlich de Vorschtellungk lohß. Zippel bejriff joarnischt, sonnern sah nuhr seine heimliche Liehwe, welliche rechts uff dor Biehe an dor Seite schtand met ä Umhangk vorrdeckt, wo nuhr dor Kopp rauskuckte. "Ach hot die ä hebsches Jesichte", dachte nuhr immer widder, wobei ä joarnich bemärkte, dasses mächtj jeschminkt woar.
Endlich jingk dor Impressarioh uff se zu un schrieh: "Und jetzt, meine Damen und Herren, sehen Sie die größte Attraktion, die größte Sensation der Welt, die Dame ohne Unterleib!" Met ä Ruck risse dähn Umhangk von dor Fijuhr, un Zippel währe vorr Schreck bahle von dor Bank jefallen. Da schtand seine Scheene metn Ohwerteil uff sonner jedräckselten Holzseil, ohm alles un ungene nischt! Dor Schreck fuhern so in de Jliehder, dasse aus dor Buhde schtärzte, ewwern janzen Weesenmarcht liehf, ohne sich ummezekucken, bis bei Hämmel Littchen in de Kneipe. Hier bliehwe dähn janzen Tahch, bisse ahmts janz benehwelt haem bei Friedan schlich, awwer mehr benehwelt noch von dähn Schreck als vom Biehre, wasse jetrunken hotte.
Frieda lahk schohne im Bette, un se wunnerte sich, daß Zippel schohn so frieh haem kahmb. Noch mehr awwer wunnerte se sich, dasse uff aemoal su unjewehnlich zärtlich mit se woar.
"Waeßte, Frieda", sahte zu ihr un jahb se dadorbei ä Schmatz uff de Backe, "wenn de aach nich mehr su hebsch bist, so ohm rum, wie die uffn Weesenmarcht, Awwer ä scheen Ungerleib haste doch noche, un nischt is scheener, als wenn su scheene hebsch beisamm is, su ohm-un ungenerum!"
Frieda vorrschtand das alles nich, se wunnerte sich awwer noch mehr, als Zippel sich in Bette uff de annere Seite drehte un korz vorrn vorrn Inschlaafen noch vorr sich henbrummelte: "Teiwel, Teiwel, wie sol die blohß moal ehre Kinger krein!"

Dor Kraeslaaf

Zippel Petzsch hotte Ärjer.
Seine Ahle, de Frieda, hottn sizen jelahßen. Nich, dasse se nu ä annern jehabbt hotte, - nae, dor Docktor hotte se uff de Kuhr jeschickt - nach Bad Ällster, wähjen Kraeslaaf. Zippel hotte immer zu ihr jesaht, se solle nich so veel im Kraese rumlaafen um jeden Handjriff vorhäher richtch ewwerlähjen, ´s hot awwer nischt jenutzt.
Nuhne sahße janz allaene haeme un hotte de janze Wärtschafft uffn Halse. Frieda hotte je alles vorhäher ärklähert un inschtruhihert, un ainijermahßen jinks je aach, awwer ähr hotte Ärjer met de Zicke.
Das Aas ließ sich nich mälleken. Se meckerte in aenerTuhr, se wolle ehre Millich lohßwähern, awwer immer
wenne metten Mällekemmer in d Nähe kakmb, fingkse ahn im Kraese rumzulaafe un ze bocken. Wenne´s Eiter beriehern wolle, schluhk se zejoahr hingne naus. Se woar ähmt an Friedan jewehnt.
Zippel brachte veel Jedulled uff. Ze erscht wolle se teuschen. Ähr bangk sich de Koppkuhke von Friedan ewwern Kopp, dasse se denken solle, ähr währe nicht ähr, Zippel, sonnern ähr
währe de Frieda. Awwer de Zicke ärkannten doche un schluhk wedder hingne naus. Zippel koche schohne, awwer ähr nahm sich zesamm un zohk noch ä Klaed von Friedan ahn un aach anne Beidorwansschärze von ser hotte sich vorrne rumjebungen. Wie ä nune in de Nähe von de Zicke kahmb, merkerte se erscht un kuckten ä bißchen bleede ahn, ähr hotte jedenfalls so ä Jefiehel jehabbt un
sich schohne jefraet, dasses jetzt klappen wärre. Se fingk awwer schohn wedder ahn, im Kraese rumzulaafen, un wie ä wedder met de Fohten ans Eiter kahmb, jingkse hungene hohk un hettn bahle aene ahnjefeiert. Nu worre seine Wuht jreßer un ähr konne bahle nich mehr an sich haheln. Anne mächtche Fluht von Schimpwärtern prassällte uff das arme Tiehr herab un de Kammeräder uffn Schachte hetten ehre hälle Fraede jehabbt, wenn se Zippeln so jeschimpt un jefluhcht hetten. Se woarn awwer leider nich dorbei. Wie sich Zippel wedder beruhicht hotte, un de Zicke aach, fieheln noch was
anneres in. ´Villeicht machts dor Jeruch´, dachte bei siche un jingk schnell in de Kammer, woe sich nackich auszohgk. Erscht riewe sich in janzen Kärper met Friedan ehern Perfiehm in, denn zohke ä rohsaen Schlipper von ihr ahn un bank sich noch ä Bistenhalter von ihr umme, dähne vorrne mächtch ausschtoppte. `Villeicht machts aach noch de Form me´´, dachte wedder bei siche, ´de Fijuhr´. Beim Bistenhalter hotte jämmerlich Miehe, dähn hingne zuzekrein. Ähr drehte sich von allen Seiten vorrn jrohßen Schpiejäll, vorrenkte
sich bahle de Knochen un worre schohn kribbelich, awwer denn
endlich hotte de Hahken in de Ehsen jekreit. Nune sahke aus wie anne Fraue, nune wedder´s Klaed drewwer, de Schärze vorrne drahn un de Koppkuhke umme, un so schliche in dähn Schtall rin.
Se kuckte nu noch bleeder, de Zicke, un bahle hotte se jedacht, de Frieda kähmenu endlich uff se zu, awwer wie se wedder da rauhen Bärgkmannsfinger am Eiter fiehelte, märktese wedder, dasses Zippel woar un bahle hotte sen jeträhten, als se hingne nausjeffelte. Das woar ehr Enge! Zippel konne sich nich mehr behärrschen, nahmb de Ackst verkehrt rum un drosch se aene vorrn Schäddel. Se woar jleich hingne newwer un alle Sorjen lohß.
Dor Briehf an Friedan jingk unjefäher so:
"De Zicke hotte aach in Kraeslaaf jekreit, awwer ich konne se doch nich zu Dir uff de Kuhr hingerhäher schicken. Ich hawwe de aene Hellefte injesalzen un de annere Hellefte in de Jläser jekocht. Anne Neie is schohn wedder in Schralle, awwer die hawwich jleich von Ahnfangk ahn an miche jewehnt. Wärscht wohl Männersachen ahnziehen missen, wenn de se mälleken willst!" De Kammeräder hotte von seiner Blamahsche nischt ärzehelt, raus woarsch
doch jekomm, awwer erscht veel schpäter.

Dor Krampf

Immer wenn de neien Jungens uffn Schachte ahnfuhern, jabs jämmerlichen Schpahß. S woarn je noch de raensten Kinger met ehern värrzehn Joarn, awwer se mußten schohn mächtch rahnklotzen un de schwehern Hunne außen Schtrehwe vortrecken.
De aheln Heier machten sich mannichen Jucks met de Treckejungens, se schpeelten in Bärgkjeist un veeles anneres. Aach Zippel Petzsch hotte se mannichemoal voräppelt, ähr schickte se fort zu de Kammeräder, moal ä Schiehnhowwel ze hoheln odder de Jewichte von de Wasserwaache; un de Luhder packten denn sonne Wacke in odder wickälten se ins Papier un de Jungens schleppten se denn vorrne hen bei Zippeln odder´s woar mannichmoal
ummejekehert. Nachtern lachten se sich hallebtoht, wenn de Kinger mettn vordutzten Jesichte daschtanden.
Awwer de Schweinerei mettn Krampf hot Zippel nie metjemacht, wie es mannicher noch heite tuht. Da worre jämmerlich dorjehjen, weile sällewer innen jungken Joarn dadormet rinjefalln woar un was bahle schlimm ausjefalln währe.
Wie ä nähmlich sällewer dazemoale als Treckejunge uffn Jlickhillefschachte ahnjefahern woar, hotten dor ahle Heier Justav Jrohße voräppelt, dähr dadorvor met anner janz besonderen Methode bekannt woar. De Kammeräder kannten seine Tricks un se jrinsten schohn, wenn ä dadormet ahnfingk. Erscht vorrzärrte jämmerlich sei Jesichte, so janz schmärzvoll, denn fingke ahn met ze schtehnen, wie wenn se ä aheln Jaul abschtächen wollten, un ähr hiehelt
dadorbei sei Baen fest. So fingke aach bei Zippeln ahn, dähr jrade zwae Tahche uffen Schacht jingk. S woar vorrn Schtrehwe zur Hallebschicht un se woarn jrahde färtch metn Friehschticke.
Dor Heier Justav Jrohße fingk uff aemoal mächtch ahn ze jammern un ze schtehnen, ähr brillt immer mehr vorr Schmärrzen, hiehelt sei Baen feste, wobei ä seo Jesichte so vorrzerrte, dasses Zippeln himmelangest un bange worre. De Kammeräder jrinsten un drehten sich umme, denn se wußten, was nuhne kahmb, was awwer Zippel nich märkte. Dähr klotzte nuhr uffn aheln Heier un ähr wunnerte sich, dasses dähn so furchtbahr schlächt jingk. "Zippel", brillte dor ahle Justav, "Menschenskinner, Zippel, hillef mich doche moal, mei Baen, ich hawwe doch ä Krampf in mein Baene, jai o jai, tuht das
weh, heb doche moal mei Baen hohgk, da jehts wedder wägk!"
Dor hillefreiche Zippel schprangk aach tahtsächlich bei Justaven hen, packte sei Baen un zärrtes in de Hehe, um in Aheln seine Schmärrzen zu ärleichtern. Wie ä nu Justaven sei Baen so richtch hohgk hiehelt, ließ doch dor Krepel jrade in dähm Moment ä jämmerlichen fahern, daß de Schtaubwolleken aus dor aheln Schachthose nuhr so uffwärbelten. Zippel woar so ärschrocken, awwer noch mehr ewwer das pletzliche donnerartje Ufflachen dor Kammeräder; un nu märkte Zippel, dasse rinjefalln woar un dor ahle Jrohße sei Schpahß mettn jemacht hotte.
Das hottn Zippel nich wedder vorjässen un ähr sahte bei siche, "du kreiste mich nich wedder!"
Un tahtsächlich, wie ä schpähter moal janz allaene metn aheln Heier Jrohße zesamm woar in dor Schrecke - de annern suchten sich jrade ä neien Schtrehb aus - fiejel doch dor ahle Justav pletzlich uff de Ahrde un brillte wedder vorr Schmärrzen. "Hillef mich doche, Zippel!" roffe in aener Tuhr, "hillef mich doch, ich hawwe sonne Schmärrzen im Leiwe, ´s reißt mei janzen Wanst uff!" ´Du kreist mich niche´, dachte Zippel bei siche, ´mich haste aemoal voräppelt,
ä zwaetes moal nich wedder!´un ähr blieb janz unbeteilicht nähm Justaven schtehn. Dähr krimmte sich vorr Schmärrzen un wällezte sich uff dor Ährde rum. In dähm Moment kahmb jrade dor Ohwerschteijer, dähr ewwerlähte nich lange un jingk zum Jrubentelefohn. Se brachten in aheln Justaven nach ewwer
Tahche un noch am sällewen Tahch hammsen schohn im Bärgkbaukrankenhaus in Eislemm sein Blinddarm rausoperiehrt. S woar bahle zu schpähte jewähsen. Zippel Petzsch hotte hingerhäher vom Ohwerschteijer noch anne Tracht Priejel metn Mehter jesackt, weile nischt jleich ungernomm hotte.

Dor Vorkehrschunfall

Dor neie Ohwerfahrschteijer Huhth hotte jeärwet.
Ä Auto, was zur damahlichen Zeit ä was janz außerjewehnliches woar. S woar nich mehr janz neie, awwer aach noch niche janz ahelt. Ä Ohpel woarsch, un noch anne Nummer hingenedrahne, ä Ohpel P4 odder 3, ´s wußte kaener mehr su jenau.
Nuhne hotte kae Fiehrerschein jehabbt, dor Ohwerfahrschteijer, awwer ähr wußte, daß Zippel Petzsch, sei Heier, Auto fahern konne un aach dorfte. "Hehern se ä moal, Härr Petzsch", sahte neilich zu Zippeln, "ich musse moal uff de Schnelle nach Vollekschtedt, bei meine Schwester. Kennsen miche da niche moal henfahern? Vielleicht heite Ahmt um achte rum?"
"Freilich", sahte Zippel, "änne Klaenichkaet forr miche un ich maches järrne. Ich bin pinktlich forr ahre Teer heite Ahmt!"
S woar Schpähthärwest, awwer noch scheenes Wätter, jedenfalls wie se aus Eislemm rausfuhern. Awwer hinger dor Ohwerhitte woar uff aemoal anne jämmerliche Worschtsuppe uff dor Schtrahße, ä mächtcher Nehwel fiehl uff aemoal nedder, dassese de Henge nich mehr forr de Aachen sähen kunnten.
Se mußten im Schritttempo fahern, un se krepelten se sich langksahm dähn Vollekschtedter Bärgk runger.
Awwer dähn sellewen Bärgk kahmb Bauer Schuwert metten Ochsenwaachen hohgkjedreckt, metten uff dor Schtrahße langk un ohne Lampe; un aach am Auto brannten de Lichter niche. Kaener sahk nu dähn annern, un´s Unjlicke woar je nuhne nich mehr uffzehaheln un zu vorrmeiden.
S dauerte aach joarnich mehr lange, denn bummstes schohne: ä Ruck un ä Knall, ä Jeschplitter von Jlas, un mitten dorchs Fieherheisjen, jenau zwischen dähn Ohwerfahrschteijer un Zippeln, de vorrne nähmanner sahßen, schob sich anne dicke Holzschtange dorch. S woar de Deicksel von dähn Ochsenkarren, die das Auto mettenmangk dorchjebohrt hotte. Nu sahßense wie uffjeschpiehßt uffn Ochsenwaachen, awwer´s Schlimmeste woar, daß aach de Ochsen metten Schäddel vorrne dorch de Scheiwe drickten,
Daß de Jlasschplitter wie närrisch in dor Jejend rumflohgken.
Se bluhteten jämmerlich, de Ochsen; un aach dor Ohwerfahrschteijer Huhth un sei Schofföhr, dor Zippel Petzsch, woarn ewwer un ewwer met Bluht beschmeert, wodorbei noch dorhenjeschtellt blewwe, obs von de Ochsen kahmb odder obs´s eijene Bluht woar.
De Ochse kuckten nuhne dorch de kaputtje Autoscheiwe met ehern Keppen un jeder, dor Ohwerfahrschteijer un aach Zippel, hotten dichte vorrne Jesichte su ä jämmerliche Ochsenbrummer forr siche. Se konnten sich noch niche moal riehern, dor Schreck sahß janz jewaltch in ehern Knochen, un se sahßen alle baede mucksmeißchen schtille un vordattert da.
Nu fingken de Ochsen aach noch ahn ze läcken, weiel se´s Bluht loßwähern wollten, un dadorbei fuhernse immer met ehrer aheln Blähke ewwer de Jesichter von dähn Leiten, die forr ihnen in dähm Auto sahßen. Dor aene Ochse läckte ewwer Ohwerfahrschteijer sei Jesichte un dor annere Ochse ewwer Zippel sei Jesichte.
Nu märktense erscht, wie naß un rauh sonne schleimiche Ochsenblähke woar, wie ä Reibeisen un janz schlibberich.
Se zitterten noch alle baede forr dähn mächtchen Schreck von dähn Unjlicke un forr dähn zwae Unjeheiern forr siche un se brachten kae Wort ewwer de Lippen, während de Ochsenblähken immerzu ewwer ehre Gusche fuhern.
S muß ä noch dor Schreck odder de Angest jewähsen sin, was dähn
Ohwerfahrschteijer pletzlich vorahnlahßte zu sahn:
"Hehern Se uff!", sahte forrn Ochsen, "hehern Se endlich uff, Se wissen wohl niche wähn Se forr sich hamm un währ ich bin? Ich bin dor neie Ohwerfahrschteijer Huhth!"
"ob Huht odder Krempe", roffe jetzt Zippel Petzsch.
"Da is nuhne nischt mehr ze machen. Härr Ohwerfahrschteijer! Laafen misse mor sowieso!"

De tolle Wuht

Mannichemoal jehts doch rächt närrisch zu uff dor Wält. Besondorsch wenn mor de Kinger immer belehern will; denn jehts ofte ins Jejenteil ewwer. Es is ähmt nich su aenfach met Kinger ummezejehn forr de Aheln, un aach de Kinger wähern met de Aheln nich immer jleich so richtch färtich un se kenn mannichemoal schwehr met se zerächte komm. So jingks aach de Mime Järtnern. Ehre Enkellin, de Juste, woar so ä richtcher Wildfangk. Fräche Schnauze,schnärzje Antworten un nuhr Schawwernack im Koppe. Met dor Schuhle hotte se sich aach jezankt. Se woar zwoar nich
dumm, awwer mächtch faul zum Lärrn. Se kunne ähmt alles schohne vorhäher un wußte manniches besser als de Lehrerin.
Nuhne fiehelte sich de Mime Järtnern, de Jrohßemudder von Justen, nich so rächt wohel un dor Doktor hotte se rächt veel frische Luft vorordnet. Se solle ähmt rächt veel schpaziehern jehn.
Juste hotte das nuhne jehehert un aenes Tahches brachte se ehrer Jrohßemudder ä mächtch jrohßes Pakeht ahnjeschleppt. "Das is forr diche, Jrohßemudder, muß´s awwer rächt vorsichtj uffmachen!"
Nuhne jahb sich de ahle Järtnern de jrehßte Miehe, dähn Bindfahden
Uffzeknibbern un außen Papiere kahmb ä jrohßer Kartongk zum Vohrschein.
"Machen vohrsichtj uff, sonst is alles wedder fort!" roffe Juste. Als de
Jrohßemudder dähn Deckel vohrsichtj abhohb, woar nischt drinne un dor Kartongk ratzekahl leer. "Nuhne isse se wedder fort, die scheene frische Luft, die ich äckstra forr diche draußen injefangen hawwe, wies dor Doktor jesaht hotte. Se sollte dich doch hällefen!" schluchzte Juste.
"Nae", sahte de Jrohßemudder, "uff was vorr Jedanken du awwer aach kimmest. De Luft kammer doch nicht infangen. Das hamm dazemoals de Schilledbärcher jemacht. Die kahm sich immer so janz schlau vohr, awwer in Wärklichkaet woarn se saudumm un die jahbs doch aach joarniche. Das sin doch nuhr Märchen! Dor Doktor maent metter frischen Luft, daß ich veel un ofte schpaziehern jehn soll, awwer jrade das fällt mich aheln Fraue immer sehre schwehr, weil ich immer so allaene bin."
"Denn komme ich met diche met, denn biste nich allaene un Zeit hawwich doch immer", sahte Juste.
Dofreite sich de Jrohßemudder un de machten sich am annern Tahch alle baede uffen Wähgk, zum Dorfe naus. Scheene langksahm, awwer Juste immer vornewägk. "Du mußt awwer bei mich bleim un mich schtitzen, sonst hots Schpaziehernjehn joakaen Zwäck forr miche", sahte de ahle Järtnern.
"Ich bin doch anne ahle Fraue un nich so ä jungkes Zickchen wie du!"
"Do haste nu aach wedder rächt" sahte Juste. "Ich muß ähmt immer rumhoppsen, awwer ä Schilledbärcher bin ich doch niche, denn die lähm doch joarniche un ich bin schpringklawännich.. Awwer jetzt bleiwich bei dich, Jrohßemudder.
Kannst dich uff mich verlahßen un dich aach uff meine Schuller schtitzen!"
So jingken se denn alle baede langksahm uffehen un jenossen de scheene Friehlingksluft. Uff aemoal blewwe Juste schtehn un sahk ä Jroschen lähn uff dor Schtrahße. Se wollten uffhehm, awwer de Jrohßemudder hiehelte se zerricke un sahte: "Das lahß man, Juste, was uff dor Schtrahße läht, das soll morlähn lahßen. Währ waeß, was da alles drahne is un währ das alles schohne In sein Fohten jehabbt un ahnjefaßt hot."
Juste zohgk anne mächtche Schnauze, awwr se sahte nischt.
Nuhne jingks langksahm weiter in Tichtungk Helzchen, was wie su ä klaenes Wäldchen woar. Juste hotte dähn Jroschen noch nich richtj vorjässen un ewwerwungen., als se pletzlich ä Schticke Papier lähn sahk. Beim Näherkomm schtällte sich raus, dasses ä Jäldschein woar, ´s mußten zähn odder zwanzj Märker jewähsen sin. Juste wollte sich schohne dadornach bicken, awwer de Jrohßemudder packte rikorohß fest zu un hiehelte se wedder ab. "Ich hawwe
dich doch vorhenn jesaht, was uff dor Schtrahße läht, das hehwet mor nich uff; janz ehjahl wasses is. Do kenn Pazilln un Bakterionks odder sonst was drahne sin un denn wärd mor krank! Ich vorbiete dich aehn vor allemoahl!" De Schnautze von Juste konne mor jetzt joarnich beschreim. Se hingk bahle bis uff de Schuhkschpitzen. Se hotte anne mächtche Wuht im Leiwe un dachte nuhr an das scheene Jäld. Se nahmb sich feste vor, wenn se nachtern allaene ist, wedder zerricke ze laafen un sich das Jäld ze hoheln, wenns noch dalähn
sollte.
Korz vorrn Helzchen, jleich zwischen dähn erschten Baehmern, lahk ä tohter Fucks. De Jrohßemudder blewwe schtehn , zeichte uff das Vieh un sahte forr Justen: "Siehsten dähn tohten Fucks hier lähn? Wenn de dähn ahnfassen tuhst un uffhehm willst, denn kannste schtärm. Dähr kann nähmlich de Tollwuht hamm un die is sehre ahnschteckend. Da kann dich kaener mehr hällefen, aach
kae Doktor niche. Denn is alles zu schpähte un du mußt ä forchtbahren Tohd schtärm. Siehste wohl wie rächt ich hawwe? Nischt hehwet mor uff, was uff dor Schtrahße läht!"
Nuhne drehten se umme un machten sich wedder uffen Haemwägk, dähn Dorfe zu.
Wie e se nuhne de erschten Heiser ärreicht hotten, da worres dor Mime Järtnern pletzlich so schlächt. Se torkelte, fiehel pletzlich umme un lahk metten uff dor Schtrahße. "Hillef mich uff!" roffe se Juste zu. "Nae", sahte die, "du hast mich sällewer jesaht, was uff dor Schtrahße läht, das soll mor nich uffhehm, schohn von wähchen dähn Pazilln, da kammer krank wähern!"
Se wolle fortrenn, awwer do hiehelte se ä Mann fest. "Na, willsten deine Jrohßemudder nich hällefen uffhehm, du Jehre?"
"Nae", sahte Juste wedder. "Se hot doch sällewer jesaht, was uff doe Schtrahße läht, soll mor nich ahnfassen un uffhehm. Wenn se nu de Tolle Wuht hot, wie dor Fucks, denn muß ich sällewer ä ahklichen Tohd schtärm, un dadorzu bin ich noch zu klaen un aach noch zu jungk!" Un fort woarsche!