Erziehung

Redt eiern Kingern mant irnmer in,
dassen se Schenies und sonst noch was sinn.
Die guten Kinger jlauwens jewiß,
weil das was Scheenes forsche is,
un se wären sich nahchert von sällewer sahn:
Met Lärn'n da fange mer jar nich ierscht ahn.

Freindlichkeit

Vetter Wärnär, der hotte ä Schtickchen Weese, dichte an 'n Bache, un jrade an dr Schtelle jungk änne Bricke ewwern Bach. Nu hotten sich das de Leite su ahnje wehnt, wenn se ewwer de Bricke jungen, denn jungen se jleich ewwer Vetter Wärnärn sei Schtickchen Weese, da kunn'se ä Schtickchen Wähk abschneiden. Vetter Wärnär ärjerte sich rahmjahr, awwer was hulfs änn? Se zerlahtschten sei Jras doch immer wedden. Ä paßte uff, ob ä nich äma ein'n fassen kunne. Jä, Huttchenfäffchen! Wenne da war, da kahmb keiner, denn das wußten se: ä var schtunn kein'n Schpaß.
Eima awwer, da kahrnb ä Fremder den Wähk langk, un weile den jetret'n Wähk sahk, da dachte sich nischt Beeses drbei un jungken au..Jrade ware ä Schtickchen her, da kahmb mei Vetter Wärnär drzu. Ne, nu jungks los:
"Verfluchtjer Kreepel! Willtänn machen, daß de von meiner Weese runger kimmest, du verdammtes Kärschkärrnjesichte. Ich schlahe dich alle Knochen in'n ohlen Wanste kaputt, du verfluchtjer Wäckworf!" Der Fremde krichte ä Schreck un jungk jleich wedder zericke uffen richt'jen Wähk. Denn sahte. "No, da brauchen Se mich doch nich so anzefahren. Ich ha e dach nich eher Jras zertrampeln woll'n. Ich ha e dach nich jewußt, daß rnr hie nich jiehn därf." "'Das dachte ich miche," sahte Vetter Wärnär, "desdrwäjen ha ich Sies au bloß in aller Freindlich keit jesaht."

Siegfried un Hagen

Weil ich äma dorch ä Därfchen kahrnb, sahk ich von weiten änne Härde Jungens schpeeln. Uff äma kahmb aener drvon in vulln Trawe ahnjeloffen uff ä Bach los, an dän ich jrade schtunne, schmisse sich an Ranne hen un beiete sich rnetten Koppe uffs Wasser nedder. "Junge", saht ich "Du bist je wo janzenjar nich jescheit, daß de hie das dräckje Wasser saufen willt. Da wärschte je krank. Un escherfiert biste au. Wenn de das kahle Wasser trinkst, da kannte je Dich'n Tod holn."
"Ach, e wo", sahte, "ich will je jar nich saufen. Ich mache mant so. Mir schpeeln, un da hiert das drzu."
"So?' fraht ich, "was schpeelt er än da ?"
"Siegfried un Hagen", sahte. "Ich bin Siejfried, un nahchert kimmt Hagen; där muß mich metten Schpieße dorchs Kreize schtächen." Un richtch, wie ä weder orntlich uffen Bauche lahk, da sahk ich, dassen'se mett Kreide ä Kreize uffen Westenbuckel jemacht hotten. lndän kahmb nu au Hagen ahnjeloffen. In dr Hand hotte ä Schticke Bohnenschtäwwel; das war dt Schpeer. Wie ä rahnkahrnb, schtellte sich hinger Siejfrieden, hob seine Bohnenschtäwwel hohk un zielte. Ä nahmb seine Sache siehre gewissenhaft un zielte änne janze Weile, dasse nich drnähm schtechen wolle.
Das worre awwer Siejfrieden ze veel. Er verlor de Jeduld, drehte dn Kopp rum un roffe: "Mache doch hen un schtich zu, Du dummes Schwein, wie lange soll ich än saufen?"

´s Järtel

Wenn jemand die Scherzfrage stellt: 'Warum trägt der König von England Hosenträger mit dem Einhornwappen?', so ist die Antwort nicht schwer zu finden. - "Weil ihm sonst die Hose runterrutscht.' Aus dem selben Grunde trägt der Mansfelder Bergmann 's Järtel'. 's Järtel ist also eines der wichtigsten Bestandteile der männlichen Kleidung. Kann es doch seinen Träger unter Umständen in sehr peinliche 'Situationen bringen. Nicht selten beobachtet man daher an heißen Tagen im Sommer, wie ein schwitzender Mann den Hosenbund "mettsamsten Järtel" ab und zu mit beiden Händen ergreift und in die Höhe zieht, um ein Sinken bis unterhalb des Äquators und damit eine gesellschaftliche Katastrophe zu verhüten. Aber's Järtel hat eine viel tiefere Bedeutung. Schiller hat einmal gesagt, mit dem Gürtel risse der schöne Wahn entzwei. Und das stimmt. - Mancher Mansfelder Junge hat es mit Schmerzen erfahren, daß oft die Wahnideen der Jugend durch den Schwung des väterlichen Järtels rücksichtslos zerrissen werden. Denn's Järtel ist ein wichtiger Erziechungsfaktor. So mancher Mansfelder ist durch dieses schlichte, vom Vater schwungvoll betätigte und mit schlagendem Erfolge wirkende pädagogische Hilfsmittel liebevoll auf den Pfad der Tugend geleitet und auf ihm erhalten worden.
Hat der Junge etwas ausgefressen, während der Vater "uff dr Schicht" ist, so ist die furchtbarste Drohung der Mutter: 'No wahrte mant, wenn dr Vater häime kimmet, dann schallte's Järtel ab!" Für einen Nichtmansfelder liegt in diesen Worten noch keine Drohung; schließlich muß ja der Vater einmal seine Kleidung ablegen, und das geht nicht ohne Abschnallen des Gürtels. Aber der Junge weiß ganz genau, was die Worte bedeuten, und die Mutter hat nicht nötig, hinzuzufügen: 'un schlett dich'n Wanst vull!" - Freilich bewirkt nun diese mütterliche Drohung nicht etwa, daß der Junge in sich geht und weitere Streiche unterläßt. Er kennt die Mutter zu gut. Bis der Vater nach Hause kommt, ist der miütterliche Zorn in der Regel längst verraucht und das Järtel vergessen. Aber manchmal ist der Groll der Mutter doch dauerhafter, als der Junge gedacht hat, und dann entfaltet 's Järtel seine Tätigkeit. Eine segensreiche Tätigkeit! Wie jeder Segen kommt es von oben, und weil jede erzieherische Tätigkeit 'auf den Grund" geben muß, so übt es seine Wirkung auf die Grundfläche der kindlichen Persönlichkeit aus.
Man sollte meinen, dieses Zielobjekt wäre nicht zu verfehlen. Und doch - Eines schönen Tages erscheint Triewests Karrel, der glückliche Besitzer eines braunen Muttermales an der Schulter, mit einer dicken Prausche am Kopfe, deren Oberfläche in allen Regenbogenfarben schillert.
Auf die Frage-, "Karrel, was hastänn da an'n Koppe?", antwortete er schwermütig-, "Das is ä Vatermal." "Was is änn dasse?' "Da hat mich mei Vater mett dr Järtelschnalle getroffen." - Die Jugend hat keinen Sinn für den Segen der Erziehung! Und so kann man auch im Mansfelder Lande vernehmen, wie in pietätlos abfälliger Weise aber die Tätigkeit des Järtels geurteilt wird. Als einmal Wärnärsch Fritze von seinem Vater ausgiebig mit dem Järtel versohlt worden ist, kommt er schluchzend zum Großvater gelaufen, mit einem Handrücken die Tränen abwischend und dabei die Wangen mit Dreckkringeln verzierend, mit dem anderen die südliche Gegend des Rückens reibend, und es entspannt sich folgendes Gespräch:
"Jroßvater, hastänn meinen Vater au metten Järtel jedroschen, wenne in de Eppel jeklättert is?" ".Ja, mei Sehnichen!"
"Jroßvater, hatänn dich dei Vater au metten Järtel jedroschen, wenne in de Eppel jeklättert is?'
Im Herzen des Großvaters tauchten freudvoll - leidvolle Erinnerungen aus der Kinderzeit auf, als er erwidert: "Ja, mei Sehnichen!' "Un sei Vater au un denn immer so witter?" Soweit reichten die persönlichen Erinnerungen des Großvaters nicht; aber er kann sich das Mansfelder Familienleben ohne's Järtel nicht vorstellen. Völlig überzeugt nickt er und wiederholt. "Ja, mei Sehnichen. ' Da holte Fritze tief Atem und sagte.- "Welcher Hornochse hatänn mant mei dän Quatsch ahnjefangen!"-
Ja, die Jugend ist pietätslos und hat keine Achtung vor den durch das Alter geheiligten Sitten und Volksbräuchen. Nicht einmal 's Järtel ist ihr heilig! Und doch - Was wäre aus dem Volke der Mansfelder geworden ohne " 's Järtel"

´s nutzt nischt

"Fritze, du humpelst je rächt, was issän das mett dich nuhrt?" "Jä, Annrees, ich ha e dich su ä paar ohle Hinnerauchen an'n Ziehn, un die dricken mich dach jottsjämmerlich!"
"Jh, da quehle dich mant nich lange drmett rum. Hule dich änne Pulle "Hühneraugentinktur" un denn sallste ma sähn, wie se wäck jiehn.""Nä, Annrees, das mache ich nich wedder, änne janze Pulle vull von dän Zeik ha ich schone ausjesoffen, awwer jehollefen hats jar nischt."

Jeder Topp finget sein´n Deckel

"Was issen met dich un met Karreln los? Ihr jieht wo nich mieh zusammen?"
"Nae. Är will nischt mieh von mich wissen. Är hat jesaht, mr paßten nich richtch zesammen. Ich wehr nich de richtche Fraue forrn."
"Was hatte jesaht? Du paßtest nich forrn? Där wird je wo immer dimmer? Ae ohler Dussel un änne ohle Breilawwe isse je von klaen uff jewähst! Un ä Dräckschwein noch drzu! Awwer jetzt isse je wo ä richtcher Brummochse jeworrn. Wie kann änn dir suwas sahn? Wenn du nich forr dän paßt, wir sollen denn forr dän passen?"

Ä schlächter Wähk

Vetter Zillich war verreist jewäst. Das kahmb bei 'n nich ofte vor. Är hotte 'n zeiten Zuhk verpaßt un war desterwäjen ehrscht schpeete in der Nacht ahnjekomm'n. Das war so jar nich nach sei'n Sinne. Är war ä bißchen engestlich un jingk nich jährn alleine in'n Dunkeln. 'De Nacht is keines Menschen Freind', sahte immer. No, awwer was hallef's änn? Är mußte sein'n Wähk in Dunkeln machen, wenne haime wolle, un daderbei warsch änne pächrahmschwarze Nacht.
Nu isses je ä janz hebsches Schticke von'n Bahnhowe bis in unses Dorf nunger. Un Vetter Zillich mußte janz alleine losjehn. Är kuckte sich ungerwäjens immer äma umme un horchte hinger sich. Un richt'ch! Är war noch nich weit von'n Bahnhowe wäck, da hehrte Schritte hinger sich. Wärsch war, das konne in'n Dunkeln nich wäck krein. De Sache war 'n nich rächt jeheier, un är dachte - "Willt mant ä linschen rascher jehn!" Jesaht, jetan. Awwer nach änner Weile hehrte, daß sei Hingermann aach rascher jingk. Är loffe noch träbber, awwer das hallefen nischt, der Annere loffe aach träbber.
"Was will än där Kreepel von diche?', dachte Vetter Zillich. Da kahmben ä Je danke. Är häpelte in Schlosserjrahm nunger; där war an där Schtelle sehre tief, un 's jingk so ziemlich schteil nunger. Drewwene kletterte wedder hohk. Är war awwer mant ä Schtickchen weiter, da hehrte, wie där Kärrel aach dorchen Jrahm häpelte. Är hehrte aach, wie ä ins Wasser ninpatschte, das in'n Jrahm schtanne, un wie ä sahte:" Aeh du liewer Jott!" Un 's dauerte nich lange, da war ä wedder hingern. Vetter Zillichen loffes eisekahlt'n Buckel uffe nunger.
Da sahke, dasse in Dunkeln jrade vor Thielns ehr'n Jahrten jeloffen war. Korz entschlossen kletterte ewwern Zaun un loffe dorchen Jahrten. Awwer da hehrte schone, wie där Kärrel aach ewwern Zaun kletterte un wedder hingern här machte.
Nu worres 'n doch bahle ze veel. Är war schone kochlädderjahr vorr Angest un vorr Laafen. Hinger Thielns.Jahrten war änne kleine Mauer, wo Liezjumbischer druffene wuchsen, un jleich da drhinger war änne Schachthohle. Vetter Zillich sahte sich- "Jetzt krauchste dorch de Liezjumbischer dorch, denn klätterschte de Hohle nahm, un wenn der verfluchte Wäckworf denn aach noch hinger dich här kimmet, denn drehsten 'n Schtock rum un drischt immer uffen nedder, immer von ohm runger dän Kärrel uffen Nischel. Da ohm biste in Vorteile, so jeschwinge kimmet där nahchtern nich hingerhär."
Är kroche denn aach los, un wie ä ohm war, da hehrte, wie sich där Mann aach dorchen Liezjum dorchwärchte un immer sahte: "Ach du liewer Jott! Ach du liewer Jott!" Die ahl'n Liezjumdchrn schien'n orntlich zerkratzt ze han. Wie ä nu de Hohle nahn kletterte, da roffe Vetter Zillich von ohm runger: 'Halt! Schteh'n jeblernm'n!" Da blewwe där Mann schtehn un sahte.-'Ach du liewwer Jott! Jeht än där schlechte Wähk noch lange so weiter? Ich kann bahle nich meh'!" Da sahte Vetter Zillich- 'Nu' sahn Se mich äma, was woll'n Sie än mant eigentlich von miche, dassen se immer hinger mich här komm'n?" Da sahte där Mann, "Ach du liewer Jott, ich bin metter Eisenbahn jekomm'n. Ein'n Zuhk hott'ch in Hechschtedt verpaßt, un där letzte Zuhk där kimmet je su sehre schpeete hie' ahn. Un ich wolle doch mant bloß Millersch besuchen, un die missen dän Brief nich jekricht han, denn 's war keiner an der Bahne. Un ich bin hie' fremd un finge mich nich zerechte. Da fraht'ich 'n Schtazjonsvorsteher, un där sahte, ich solle mant immer hinger Sie härjeh'n. Sie wohnten janz dichte bei Millersch. Das ha'e ich denn aach jemacht. Awwer näi, näi, was is das forr ä schlechter Wähk, Achachach, ich bin je wie auskalaunt. Mei Hemmede, das kann ich je bahle ausringen. Un meine Henge die sin zerkratzt un mei Jesichte. Jeht än där schlechte Wähk noch lange so fort?"
Wie das Vetter Zillich hehrte, dasse sich um nischt un wedder nischt abjedraascht hotte, da mußte denn doch lachen, un är sahte vorr dän Anneren- 'Na, denn kommen Se mant, denn will ich Sie mant ä bessern Wähk weisen un denn bei Millersch abladen."

Dr Weihnachtsmann kemmet

Weihnachten is doch's schennste Fest for de Kingen. Wie dazema dr Härr Paster in de Schule kahmb un wolle sähn, ob de Kinger was konnten, da frahte au Thatens Karreln: "Welches sind die drei großen christlichen Feste?" Un Karrel antwurtete - un das kahmb wie aus dr Pistole geschossen: "Weihnachten, Schlachtefeste un Bärkmannsschießen". Weihnachten, das schtunne an dr Schpitze. Un wemmer so zoricke denkt- 's is je schune ä Weilchen här- von Weihnachten hat mer de schennsten Ärinnerungen.
Schon Wochen vornewäck, da lahk das in dr Luft: Wenn uns denn unse jroße Schwäster ins Bette brachte, denn blewwese ierscht immer nach ä hallewes Schtinnichen sitzen, indän dassese was schtickte oder häkelten tat for unse Eltern. Das mußte se je haemlich machen, dasse se nischt jewahr wärren. No un die taten an, als ob se nischt märkten, wenn se denn änne hallewe Schtunne brauchte, wo se sinst mant ä paar Minuten jeblemm war.
Un korz vorm Fäste, da schwatzen mer uff der Schledenbahn von nischt annern als wie von Weihnachten.
"Hatten ihr schune ä Christbahm?"
"Nae, mir machen kaen'n, mir han änne Pärremide."
Wie ich noch ä Junge war, da hatten se in rnännijen Heisern noch Pärremiden. Se war'n dazema schune so ziemlich aus dr Mode. Awwer's jahb nach weche, un mir Jungens kuckten se immer als was janz Besonneres ahn. Als de Lichter ahnjeschteckt worr'n, denn drehete sich das Janze, un da kuckten mer denn immer mett Bewunnerungk un dachten: "Das is doch schenner wie su ä Christbahm; där drehet sich niche, där schtieht immer schtille."
Un wemrner von'n Christbahme jeschprochen hotten, denn jungks an de Je schenke. Wasses jähn wärre, das wußte kaener, awwer 's worre doch vermut't. "Waeßt än schune, was de kreist?"
"Ich jlauwe, ich kreihe a Bankschleden".(Heite nennt mer su ä Dingk ä "Rodelschlitten") "Olle, das wärd scheene. Denn machen mer uff der Schledenbahn Eisenbahn. Du bist metten Bankschleden de Lokkernotive, un mir bringen denn unsere Kurrn alle hingernander drahn un machen Zuhk."
"Un was kreist du en?"
"Ich jlauwe, ich kreihe änne Lädderhose; der Beitlär hat mich Maß nähm missen." Un so jingk das Schwatzen hen und här.
Un wenn denn der Haelichahmt kahmb, denn worre ierscht frieh dr Bahm in de Hitsche jebracht.(Eiserne Schtenner jahbs dazema niche.) Unse helzerne Christbahmhitsche war je noch ä Ärbschtickchen von Jroßvater här. Där Bahm mußte ungene ierscht ä bißchen beschnippelt wärn, dasse ins Loch paßte. Denn worre mett der Lotsäje ä klaener Schnitt ungene in'n Schtamm jemacht, un wenn der Bahm in der Hitsche sahß, ä klaener Holzkeil ninjetrewwen, dasse feste sahß. Un denn worren de Lichter drahne feste jemacht. Die worrn nich uff de Zwaeche jeklemmt wie heite, nae das warn Blechdillen mett langke Drähte, un da worren metten Nahchelbohrer Lecher in'n Schtamm jebohrt un de Lichtdillen da ninjeschteckt. Ach ja, 's war ja ä bißchen umschtendlich, metter Pärremide jungks fixer, weil se immer färtch war!
Un denn jungks Ahnputzen los! Da dorften de Kinger mett hällefen. Denn schnitte de Mutter anne Masse Baumwollnsfaddens. Da worrn Eppel drahn jebunden; rute mußtens sin. Un denn de Nisse. Da worre ierscht ä Schnippelchen Holz zwischen de Schale jekeill. Denn worre de Nuß da drahne wie an ä Schteele ahnjefaßt un ins Maul jeschteckt, daß orntlich Schpucke uff dr Schale war, un denn worre se uff ä Blättchen Blattjold rumjekullert, bissense janz varjoldt warn. Un denn worren se an Bahm jebungen. Männiche Leite machten das au mett Hasselnissen. Awwer da konne mer kae Helzchen ninkloppen; da worre dr Faden mett ä Klecksjen Siejellack ahnjekläwet. No, un denn Fennekschtickchen, das war je doch de Haaptsache. Denn jungks los: "Mutter, das hie is kaputt! Kemmern das ässen?" No, un rnänniches jungk au bein Ahnbingen kaputt; mer mußte mant ä bißchen zu siehre zupacken. Un das hotten de Kinger orntlich raus. Zukkerschtickchen jahbs au, awwer veel niche. Un da suchte sich jeder was aus, wasse jährn hotte un sahte: "Hännich, Mutter, wemmer'n Bahm abtanzen, denn kreihe ich das."
Su war das nu au bei Neimanns. Vetter Neimann hotten Bahm färtch jemacht, un de Miehne Neimann un de Kinger putzten 'n ahn. Mielechen, die war nu bahle achte, die hullef schune orntlich mett. Fritze, därde ierscht sächse war, tat je au, wasse konne; awwer seine Hauptforsche war, dasse rächt veele Fennckschtickchen kaputt machte.
Wie sen färtch hotte, da sahte de Miehme Neimann: "Nu will ich ierscht äma bei de Jrußemutter jiehn. Sitt hebsch artch. Hierschte, Fritze? Nammittahk jiehn mer denn in de Christmitte alle zesamm'n. Wärde nich artch jewäst is, därf denn nich mett.' De Jrußemutter un Onkel Karrel, was dr Neimann ehr Bruder war, sahßen jrade bein Mittahchesbrute. Da sahte Miehme Neimann- "No, Mutter, wie issesen? Kirnrnesten au heite ahmt ä bisschen bei uns? Un du, Karrel, willtänn disma in Weihnachtsmann machen?" Onkel Karrel schmunzelte un sahte: "Warumm än niche? Ich ha e mich schune jedacht: Von unsen Vater da henget nach ä ahler Mattenk da, dän zieh ich ahn, un denn mach ich mich von ä Kartoffelsacke änne Kapuze un bringe mich de ahle Larve mett dän langken Barte vor un ä Schtrick um 'n Leib. Denn bin ich a richtcher Weihnachtsmann, un kaener kennt miche. De Miehme Neimann lachte un sahte: "Das is je fein! Un noch aens.- Mielechen brauchste nich angest ze machen, das is je ä artches Kind. Awwer Fritze, dän kannste ma seine Sinden orntlich vorhahlen. Där Schtromer schtickt jetzt immer vull Dummhaeten. Un hiern tut ä jar niche!" "No, machts mant hallewäje, 's is je noch ä Kind," sahte de Jrußemutter, "also mir komm'n hinger bei eich."
"Ich wäre meine Sache schune machen", sahte Onkel Karrel un lachte, "ä soll schune seins kreihn!"
Nammittahk nahmb de Miehme Neimann ehre Bande an de Hand, un jungk mett se in de Christmitte. Jedes Kind hotte ä buntes Weihnachtslicht in der Hand. ´s war schune dämmerich, awwer der Schnee leichtete janz helle. Wie se ä paar Schritte jejangen war'n, da funken de Klocken ahn mett ze leiten. Das klungk su feierlich ewwersch weiße Land. Mielechen war janz schtille jeworrn un hierte ahndächtch zu, wie schiene das klungk. Fritze, där schwatzte laut los, un de Miehme Neirnann botte ehre liewe Nut, dassesen schtille han wolle.
No, un wie se nu ierscht in de Kärche kam'n, da schpärrten je de Kinger Maul un Nase uff. Da schtunn'n vorrn an'n Altare ä jroßer, jroßer Christbaum, ewwer un ewwer mett Lichtern ahn un kleckstense uffen Rand. Mielechen sahß siehre ruhich, awwer Fritze där hotte immer was ze frahn: "Mutter"' pischperte, "wärd dänn au nachert jesungen?" "Ja," sahte de Mutter. "Mutter, singe rnern da au wedder das Lied. Als spräch er, wollt in mir ärkennen vorn Dreier Hoffnungk schtilles Bild?" "Ja", sahte de Mutter, "awwer sick nu mant schtille."
Un denn brauste de Orjel los, un dorch de Kärche da klungks:
"Dies ist der Tag, den Gott gemacht,
Sein wird in aller Welt gedacht."
Un alle die schien'n Lieder, un die liewe ahle Jeschichte vun´n Christkinne in'n Stall un vun'n Härten uffen Fälle un 'n Engeln. Mielechen sahß, als wie wennse in änner annern Wält wier; die veelen, veelen Lichter un alles das Schiene, wassese hierte, hotte se janz benomm'n. Fitze, där kuckte sich immer äma umrne, un wolle seine Mutter au immer äma was sahn. Awwer de Michme Neirnann jahben denn immer ä klaenen Klaps un sahte: "Pscht!'.
Zuletzt sungen se alle: "0 du fröhliche, o du selige, gnadenbringende Weihnachtszeit!" - Un denn jungense haeme, un de Lichter varloschen, un de janze Wunderwelt war wedder wäck.
In Ahmt kam de Jrußemutter un sahte, Onkel Karrel wärre vielleicht in ä Schtinnechen au kumm'n. Ä hette ierscht noch was ze tune. Un de Kinger die drengelten sich an de Jrußemutter rahn un hotten su veel ze ärzehl'n von der Christmette.
Uff äma pumpertes draußen. Vetter Neimann schmunzelte su ä klaenes linsjen un sahte: "Nann, was issän dasse?" De Michme Neimann sahte: "´s wärd doch nich etwa der Weihnachtsmann sin?"
"Ich jlauwe, das isse," sahte de Jrußemutten. De Kinger schtunn'n mucksemeisjenschtille da. Da pumpertes wedder un änne tiefe Schtimme roffe: "Kennter 'n bäten?" Da waren de Kinger wie varschtaenert. lndän jungk de Teere uff un der Weihnachtsmann kahmb rin. Är hotte ä langken Bart un ä Sack uffen Buckel un änne Kaputze uffen Koppe, jrade wie in 'n Billerbuche.
Nu winkte Mielechen rahn un sahte: "Bäte mal!" Da nahmb Mielechen de Henge zesamm'n un bätete janz schichtern: "Du lieber heilger Christ, der für uns Kinder kommen ist" un se sahtes siehre schiene här, un se blewwe nich ä aenzches ma schticken. Da sahte der Weihnachtsmann: " Du bist ä artches Kind, mei Mielechen, dadrum sollte au ä jrußes Honnekkuchenhärze han." Dadermett jriffe in 'n Sack un jahb se das Härze, un Mielechen kuckten janz varklärt ahn un jahb in Weihnachtsmann de Hand un machte ä Knickchen un sahte: "Ich danke au schiene!" un denn kucktese janz schichtern bei ehre Mutter un nicktese zu. Derweile wengete sich nu der Weihnachtsmann an Fritzchen: "Kannt dun au bäten?" Fitze bätete los: "Liewer juter Weihnachtsmann, kucke mich nich so beese an.
Schtecke Deine Rute in, ich will immer scheene artch sin."
Da sahte der Weihnachtsmann: "Bistänn au immer artch? Sahk awwer de Wahrhaet!" Fritze bewwerte an'n janzen Leiwe un sahte: "Ja, mehrschtens - männichmal" "No", sahte der Weihnachtsmann, "mett deiner Artchkaet isses nich siehre weit här: Eejahl machste deine Schularwaeten nich orntlich, eejahl willte nich bei'n Kaafmann jiehn, eejahl hierschte nich, wenn deine Mutter was saht, eejahl-"
Awwer weiter kahmbe niche. Fritze lachte uff äma un roffe: "Hä, du bist jar nich der Weihnachtsmann. Du bist Onkel Karrel! Ich hieres doche! Du sahst immer "eejahl!"
De Ohl'n, die mußten sich ahnhahl'n, dassense nich rausplatzten. Där Weihnachtsrnann varzohk awwer kaene Miene. Das konne nämlich aach jar niche, weile änne Larve hotte, an das war ä wahres Jlicke. Denn sahte: "Du geruchloser Bengel" - ä wollte ruchloser sahn, awwer in der Uffrejungk sahte was varkiehrtes - hat dei Onkel Karrel su änne tiefe Schtimme wie iche? Hat där su ä langken Bart? Soll ich meine Rute aus 'n Sacke hul'n?" "Nae, lahßese mant schticken", sahte Fritze janz engestlich, "ich will au artch sin."
"Nun," sahte der Weihnachtsmann un redete liewer ä bißchen hohk, dasse sich nich wedder verplapperte, "weil du so schön bäten kannst, kreiste au ä Honnekkuchenhärze. Awwer hiete Dich. Ewwersch Jahr komme ich wedder un da will ich sähn, ob de artch jeworr'n bist un au eejahl richtch parierscht." Daderrnett jahbe au Fritzen aus'n Sacke ä Härze, drehete sich rum, schlampte naus un sahte noch in'n Nausjiehn: "Ich muß heite noch bei veele Kinger jehn."
Wie ä draußen war, da taueten de Kinger ierscht richtch uff, denn au Fritze war wedder siehre klaenlaut jeworr'n, wie, ä das Wort Rute hierte. Un so wissen de annern ehre Honnekkuchenhärzen un fraeten sich.
Nach ä Weilichen, 's war änne knappe Värtelschtunne vergangen, da kahmb au nu Onkel Karrel rin un sahte: "Jutten Ahmt, Schwahcher! Jutten Ahmt, Bärtha, jutten Ahmt, Kinger!" Da sahte de Miehme Neimann: "Du kimmest je su schpeete?"
"Jä", sahte Karrel, "der Saecher jungk niche, dän ha ich ierscht wedder in Jangk brengen missen."
"Schade", sahte Vetter Neimann, "wenn de mant zähn Minuten frieher jekumm'n wehrscht, da hettste in Weihnachtsmann noch jesähn; där war vorhinnt hie!"
"Was?" sahte Karrel, "das tut mich awwer laed. Dän hett ich jären jesähn. Wenn där varflixte Saecher nich jewäst wiehr, denn wehr ich je mett der Mutter jekumm'n. No, Kinger, hattern eiere Sache jut jemacht?"
Da kahmben alle baede un wissen ehre Honnekkuchenhärzen. Un Onkel Karrel lachte un sahte: "No, Fritze; Dich hettch äma sähn un hiern meechen. Du hast jewiß in Weihnachtsmann vorjeflunkert, daß de immer ä artcher Junge jewäst bist. Wenn ich derbei jewäst wier, denn hett ich jesaht.- Jibb dän kae Härze, jibben liewer in Hosenbodden voll. Sick froh, daß ich noch haeme ze tun hatte."
No, nu mußte je Fritze janz jewiß, dasses vorent doch der Weihnachtsmann jewäst war un nich Onkel Karrel.
Ach, was war das noch for ä hebscher Haellichahmt. Su veel wie den Ahmt is bei Neimanns lange nich jelacht worr'n.

Wemmer zu eifrij is

Wie Vetter Meise äma nach Järbschtedt kahmb, da bejäjenten Bettchersch Männe, därde ä Fährd fiehrn tat. Vetter Meise blewwe schtien un kuckte sich das Fährd ahn.
"Ae hebsches Tier", sahte, "wo will'denn mittan daderrnett hen?"
"Bein Viehdokter",
"Bein Viehdoktor?" frahte Vetter Meise,
"lh, weisen doch äma här."
Von de Viehdoktersch wolle Vetter Meise nich veel wissen. Är war sällewer ä hallewer Viehdokter, un seine Kiehe un sei anneres Vieh korierte immer sälleweer. Da war je denn das Fährd, das bein Viehdokter solle, ä jefungenes Frässrn forrn.
"Weis dach äma här!"
Är bekuckte das Fährd vun hingene un von vorne, befiehltes von allen Seiten un schittelte 'n Kopp.
"Was sall änn dän fehlen?"
"Ich waißes niche!," sahte Männe.
"Ich will dich äma was sahn. Dän fählt jar nischt", sahte Vetter Meise, "där braucht ewwerhaapt nich bein Viehdokter. Jiehk mant wedder haime metten". "Nai", sahte Männe, "ich mussen doch bein Viehdoktor brengen."
"Ich sahe dich doch awwer,'s nich neetch, das brauchste niche."
"Ja", sahte Männe.
"Du dummer Junge"; sahte Vetter Meise, "wenn ich dich sahe, 's nich neetch, denn isses nich neetch. Warumm sall än där bein Viehdokter, wenn'n nischt fehlt."
"Jä", sahte Männe, "´s is dach 'n Viehdokter seiner. Ich hahen dach nuhrt zun Beschlahn jefiehrt."

Von´n Zehneraustrecken

Weil ich neilich äma Schmitdts Fritzen, mei'n ohlen Schulkamerad, bejäjente, da ware jrade bein Zahndokter jewäsen.
"Waeste, Ärnst', sahte, "met die Zahndoktersch jetzt, das is mich nischt, da hotte ierscht änne Weile in'n Zahne rumjepolekt, denn hotte da ärjend su ä Dräckzeik ninjeschmehrt, un denn sahte: "Kommen Sie übermorgen wieder. Dann will ich mal sehen, was wir mit dem Zahne anfangen." Also ich denke, ä is fartch. Drweile wille ierscht äma sähn, wasse ewwerhaupt ahnfangen will. Jiek mich wäck mett die Doktersch."
"Jä, Fritze", sahte ich, "da kann ich Dich nu nich rächt jähn. Mei Zahndokter, das is ä tichtcher Mann, där seine Sache varschtieht. Wenn där far mich saht: "Ich will mal sehen, was ich mit dem Zahn anfange", denn sa ich mich: Där Mann jiwwet sich alle Miehe, mich meine paar Knochen in'n Maule zu erhahln. Un waeßte, Fritze, da fraie ich mich drewwer; denn worurnm, Mer wären nu ohlt, un de Zehne wären immer wennijer. Da muß rner sein bisschen Zehnezeik zu Rate hohlen!'
"Ne waeßte", sahte Fitze, "da kann ich je Dich nich janz unrächt jähn. Awwer waeste, ich mußte so an unse Jungensjohre denken. Dazema jabs bei uns noch kaene schtudierten Zahndoktersch. Da junk mer bein ohln Balwier. Un där hottes nich neetch, ierscht lange ze ewwerlähn, wasse machen wolle. Där kuckte ins Maul, suchte sich dän richjen Zahn aus un denn treckten raus. Das jefuhlt mich besser, wie jetzt die langke Mährte." - Dadermett jungke ab.
No da mußte ich zoricke denken, wies dazema war. Fritze hotte rächt: Veel Sache worre dazema nich jemacht, un ich sähe heite noche, wie dazema de Weiwesen ahnkamen: Uff dr Backe ä Kamillnkissen un ä dickes Tuch drewwer jebungen un allebaede Henge druffjedrickt. Un wenn se denn far dr Hausteere schtann'n, denn trauten se sich ierscht nich uffzeklinken, bissen se sich endlich ä Härze scheppen taten un ninjingen. Un denn dauertes ä Weilchen, denn hierte mersche drinne juhchen un jreel'n. Ich schtunne äma met Männekens Alwärten ungern Fänster, un wie ich das hierte, saht ich: "Jetzt treckten raus." Awwer Alwärt, därde dadrinne schune bewannert un sachvarschtennijer war, sahte.- 'E wo, da brellt se veel sätter. Jetzt hat se iehrscht jesähn, wie e de Zange ausen Tischkasten nimmet, un da hat ses met dr Angest jekricht." Un richtch, jleich druff, da krieschte se ierscht orntlich los. Un nach änner Weile, denn kahmb se wedder raus, de Backe wedder feste verbungen, un de Trän'n, die kullerten mant so ewwer de Backen, un alle paar Schritte da blewwe se schtiehn un schpukte ä Maul voll Blut aus.
Äma ha ich au zujekuckt, das haeßt, mant dorchs Fänster, wie dr Balwier das machte, wenne ä Zahn raustrecken tat: Da mußte sich dr Patzjähnte uf de Hitsche setzen. Denn schtellte sich drhinger, beijten'n Kopp zorricke, un klemmte den feste zwischen seine Knien. Denn mußte där's Maul uffmachen. Daderbei jabs ierscht ä klaenes Theater, indän daß där mich wolle. Un wie en denn schließlich se weit hotte, denn fuhren met dr Zange ins Maul, wärchte änne Weile hen un här. No un schließlich, da hotten richt'ch raus. Ja, ja! Wehtun tats schmählich. Jenner Zahndoktor hotte schune rächt, därde far sein'n Patzjänten sahte: "Jetzt kommt ein Augenblick, wo Sie große Schmerzen haben werden. Also beißen Sie die Zähne zusammen! Un machen Sie den Mund dabei recht weit auf!"' Vun wäjen schmerzlosen Raustrecken, das jabs dazema bei uns nich. Un wies nahchert in jroßen Schtedten Mode worre, da kahmb das noch lange nich bei uns uffs Land. Das konne mer sich au jar nich vorschtelln. Daß das schmählich weh tat, das hierte aenfach drzu. Da hotte sonst was jefählt. Da kahmb äma änne Fraue, diede aus Halle zu Besuch war, bein Schäfer uffs Redchen naus, därde au Zehne raustrecken tat, un frahten: "Ziehn Sie die Zähne schmerzlos?" Där Ohle kuckte se ierscht jruß ahn, weile jor nich wußte, wo die henwolle. Awwer denn dämmertes bei'en, un är sahte: "Far jewehneklich ja! Awwer neilich, da ha ich aen'n trecken missen, das verdammte Luder sahß schmählich feste. Da ha ich mich drbei orntlich de Hand verschtaukt. Das ha ich noch ä paar Tage jefiehlt. Awwer wie jesaht: Far jewehneklich jiehts schmerzlos ab." No, das war je denn wärklich janz trestlich far die Fraue; awwer de Angest war doch jreeßer un se hat sich kain raustrecken lahsen. Ja ja, de ohle Zeit hotte veel Jutes. Awwer's Zehneraustrecken jehierte nich daderzu.